رواية عشق بغير حسبان

:_ مرفوضه ازاي حضرتك؟
رد ببرود وهو بيرمي الملف على المكتب:_ يعني مرفوضه من الشغل، مش هنقبل نشغلك، ايه مبتفهميش؟
:_ ليه بس انا متفو....
مرفوضه
قاطعني وقال بصوت عالي:_ المقابله خلصت اتفضلي..
سحبت الملف من فوق المكتب وخرجت وانا بعيط، وقفت قدام الأسانسير وطلبته وانا عماله امسح دموعي وبندب حظي وبقول لنفسي:_
يعني بعد كل دا متقبلش!
باب الاسانسير اتفتح ودخلت وانا باصه في الأرض وبعيط، مكانش في حد غير واحد بس...
سمعت صوته بيقولي بعد ما الأسانسير بدأ ينزل:_
ايه اللي حصل؟
قولتله وانا بعيط ولسا باصه في الأرض:_
حضرتك المدير البارد اللي هنا في الشركه....م..مرديش يقبلني في الشغل...مع مع إني مش شايفه أي سبب يخليه يرفضني!

سكت شويه بعدها سمعت صوته الرجولي بيقول:_
تسمحيلي أشوف السي ڤي!؟
مديت ايدي وادتهولي في نفس الوقت كان الأسانسير اتفتح وخرجنا وقفنا قدامه..
فتح السي ڨي وبص عليه بعدها قفله ورجعولي وهو بيقول:_
تعالي ورايا..
رفعت عيني عشان اشوفه لاقيته اداني ضهره وركب الاسانير تاني...

دخلت وراه وبصيت عليه تاني...كان شاب وسيم بحد كبير، ولابس بدله رمادي وباصص قدامه بثقه..معرفش ليه حسيت بأمان وضعف لما وقفت جنبه!
الاسانسير اتفتح وخرجنا واتفاجئت انه نفس الدور اللي نزلت منه بتاع المدير..
قولتله وانا ماشيه وراه:_

حضرتك رايح فين..
مردش على سؤالي واتفاجئت بيه بيفتح باب المدير وبيدخل مره واحده وانا وراه...
المدير قام وقف وقال بإرتباك:_ مستر تميم...اهلا اهلا بحضرتك إتفضل..
الشاب اللي معايا وقف قدامه وقاله:_
ايه السبب اللي خلاك ترفض البنت دي؟
المدير قال بإرتباك شديد:_ انا...أبدًا يا فندم كل الحكايه انه يعني احنا بنختار عملاء يكونوا وجهه للشركه..
رد وهو حاطط ايده ورا ضهره:_
وفي رأيك انها مش وجهه للشركه؟ البنت معاها تلت لغات وخارجه بإمتياز من كليتها...
رد المدير وهو بيبصلي بِغل:_

أقصد وجهه مشرفه في الشكل!!

حسيت بإحراج شديد من اللي قاله...وخصوصًا لما لاقيت مستر تميم لف عشان يشوف شكلي ووقتها بصيت في الأرض..

سمعت صوته تاني بيقول:_ واضح إنك أعمىٰ يا معتذ، البنت هتبدأ شغل من بكرا..وتكون في قسم البرمجه..

خلص كلامه وخرج من الأوضه..رفعت راسي وانا ببص للمدير بإنتصار...

قالي وهو بيجز على اسنانه:_

جيبالي مستر تميم...هوريكي..

وبعدها عمل اتصال وجات السكرتيره بتاعته وقالها تاخدني عشان تفهمني طبيعه شغلي اللي هبدأه من بكرا..