#تزوجت_أختها بقلم همس حسن
بدر نايم في أوضة الاطفال.. سمع صوت في الريسبشن
قام جري على برا بسرعة يشوف مين برا
زهرة لابسة هدوم الخروج وواقفة بتلبس الكوتشي وبتفتح باب الشقة
بدر: استني هنا رايحة فين
زهرة: ايه ده انت مش كنت نايم ؟؟
بدر: نومي خفيف ياستي وصحيت علي صوتك
رايحة فين بقى ؟
زهرة بتفتح الباب: رايحة مشوار يا بدر
بدر حط ايده ع الباب رزعه قفله: هو ايه اللي رايحة مشوار يابدر، شايفاني قرن فلفل مسلوق قدامك
انا جوزك ومن حقي أعرف انتي رايحة فين ويا اوافق يا ارفض كمان
زهرة: والله !!
طيب يا بدر.. انا رايحة الفيوم أشوف مها وأحاول ارجعها معايا البيت، ارتاحت كدا خلاص ؟
بدر: اممممم.. بس للاسف انتي مش هتروحي المشوار ده يا زهرة اعذريني
زهرة: نعم ؟؟؟؟؟
انت من أولها هتتحكم فيا.. بقولك رايحة أشوف اختتتي
بدر: وانا بقولك مش هتروحي ايه مسمعتيش
زهرة: وده ليه يعني ؟؟؟؟
بدر: معنديش اسباب اقولهالك دلوقتي يازهرة
زهرة: طيب لما تلاقي الأسباب ابقى حاول تمنعني بقا
بتفتح الباب وتجري على برا بسرعة.. بدر بيجري وراها وبيمسكها
بدر بغضب: هو انا مش قولتلك مش هتروحي في حتة لازم اعيد كلامي كتير.. ادخلي يازهرة بالذوق احسن ما اشيلك ادخلك بالعافيه
زهرة بصوت عالي: وانا قولتلك هروح لاختتتي يعني هروووح
بدر: شكل الذوق مش جاي معاكي.. تعالي بقا عشان انا خلقي ضيق
شالها بالعافيه دخل بيها على جوا وهي بتصوت وبتزعق بعلو صوتها... ناهد سمعت الصويت اللي ع السلم فتحت الباب وطلعت تجري
كانو هما دخلوا الشقة خبطت ودخلت وراهم
زهرة: انت فاكر انك تقدر تحسبني في البيت يا بدر ؟؟؟
بدر: اه أقدر احبسك يا زهرة وامشي حياتك كلها بدماغي كمان عشان خايف عليكي واللي يقدر يعارضني في ده يعارضني
زهرة: والله ؟؟؟؟
ناهد: مبدأيا انا آسف اني طلعت فجأة واتدخلت بينكو بس صوتكو كان عالي اوي بجد وانا اتخضيت وطلعت اجري
ثانيا بقى.. تاني مرة يا بدر لو لقيتك بتتكلم بالاسلوب ده مع مراتك هـغضب عليك وربنا ما يوريك غضب الأم ممكن يعمل فيك ايه
ثالثًا.. انزل اقعد في الشقة تحت عشان انا عايزة اقعد انا وزهرة لوحدنا واهو منها افكها بعد النكد ده كله
بدر: ماشي هسيبكو وانزل بس زهرة متخطيش برا عتبة الشقة دي ياماما.. اللهم بلغت
عن اذنكو
سابهم بدر ونزل علي تحت.. راحوا قعدوا ع الانتريه
ناهد: اول حاجة حمدالله على سلامتك ياحبيبتي.. نورتي شقتك ونورتي العماره كلها
زهرة: منوره بأهلها يا طنط ربنا يباركلك
ناهد: تاني حاجة بقى.. طبعًا انا زعقت ل بدر وقولت الكلمتين دول منها عشان انتي تحسي ان ليكي ضهر وسند من بدايتها ومتزعليش ولا تشيلي في نفسك، ومنها عشان هو قبل ما يفكر يعلي صوته عليكي تاني يفكر قبلها
بس صدقيني يا زهرة بدر بيخاف عليكي بجد وعشان كدا مكانش عايزك تنزلي.. اللي حصل مكانش قليل بردو يابنتي
زهرة: عارفه ان اللي حصل مكانش قليل والطريقة اللي اتجوزنا بيها اصلا كلها غلط.. بس انا بجد تعبت ومبقتش قادرة احدد مين معايا ومين عليا فين الصح وفين الغلط
حياتي كلها اتشقلبت في ثواني وكل حاجة اتغيرت وفتحت عيني لقيت نفسي متجوزة خطيب اختي وحاجة نيلة يعني **بتعيط** وحاليًا انا في أضعف اوقات حياتي محتاجة اللي يطبطب عليا ويوجهني مش اللي يزعق ويشخط
ناهد بتاخدها في حضنها وبتطبطب عليها: انا موجوده ياحبيبتي وهطبطب عليكي لحد ما تزهقي كمان
**زهرة بتحضنها جامد وبتعيط **
ناهد بتعدلها وبتمسك وشه: انا عارفه ان عمر ما حد هيقدر يملى مكان والدتك الله يرحمها بس انا من اول دلوقتي هبذل كل جهدي إني املى جزء بس من مكانها واكونلك أم موجودة معاكي طول الوقت في الحلوة والمُره
زهرة بتبتسم وبتدمع دموع فرحه: وانا هبقى أسعد واحدة في الدنيا لو عملتي كدا ويكون ليا الشرف ياطنط
ناهد: خلاص بلاش طنط دي بقا
زهرة: هيكون ليا الشرف.. ياماما
❤️
❤️
ناهد بتحضنها: احلي ماما سمعتها والله
يلا احكيلي بقى ايه اللي حصل معاكي الفترة اللي فاتت دي كلها عشان اديكي نصيحتي واتابع معاكي الأحداث من اول دلوقتي
زهرة: حاضر هحكيلك
**في بيت ناهد تحت **
هند ماسكه طبق لب وبتتفرج ع التليفزيون.. لقت بدر بيفتح باب الشقة وداخل .. اول ما شافته اتخضت والطبق اتنطر من ايديها
هند بخوف: هي فين ماما منزلتش معاك ليه
بدر بيقرب ناحيتها: ماما فوق.. عندها مهمة تانية بتعملها
بس متقلقيش انا مباكلش يعني
هند: والله يا بدر لو ضربتني لا اصوت واطلع انده ل ماما
بدر بيقرب ناحيتها اكتر
هند: بدر والله ما كان قصدي اقول اللي قولته ل زهرة فوق انا بس من غيظي منها طلعت كلمتين فش غل
بدر: سيبك من الهري اللي حصل فوق ده كله عشان هحاسبك عليه بعدين.. خلينا في المهم
هند: وايه هو المهم
سند رجل على كنبة الانتريه جنبها بالظبط والرجل التانية في الأرض وبينه وبينها سنتيهات بسيطة جدا وهي بصاله وقلقانه
بدر: من كام يوم سألتك سؤال واجابتك معجبتنيش فـ هسألك نفس السؤال تاني في ظروف مختلفه ووقت مختلف واتمنى أسمع اجابه مختلفه بردو
هند: أسأل
بدر: يوم الخروجة الي حصل من شهر اليوم مشي ازاي بالتفصيل.. ولو وقعتي تفصيله واحدة والله يا هند ما هخلي فيكي حتة سليمة وانتي متعرفيش انا بالغضب اللي جوايا منكو ده ممكن أعمل ايه دلوقتي
هند: حاضر هحكيلك اللي حصل بالظبط ورزقي على الله
بدر بيرجع بضهره وبيقعد علي ترابيزة الانتريه قدامها: حلو.. كلي آذانٌ صاغية
